Kom fij iyael ñi kimmeal ta che fij eluwkülechi wejin mew, yafütupem ruka, wej re ruka mew ka elkülechi wejin mew. Kom tüfa chi el wejin azkünukey ñi iyael kuyfi kimün mew chem mapu ñi puwün ta che, ka müley ta xürümgelu ta wigka iyael kam ka xipa iyael egu, fey ti kimlu ñi faley pin chi kimün mew. Kom fijem ta tukuel chi iyael mew, fij newen ta nieyey ka lawen küf kütu, kuyfi mew küpalelu chi fij pepikan, fey ta ñi newenküleam ta che, fey ñi fenxenturpual ta mogen. Ñi pegeken chi fijem iayeltual, kishu ta ñi küzawyeel chi pu che lof mew ta nentuel, femechi ñi wenuntuniel ta kümefelen pin chi zugu lof mew. Pu Mapunche ta zuamyepenolu ta ka xipa iyael ta ñi mogeam, mapu ta kom wülpelu ta mogewe, fij iyael güjiw ta tüfey, ka fijem ta xipayelu ta lafken mew. Lawen zugu mew ka konküley ta mapu machi ñi kimün mew kam lawentuchefe. Mufü che ta mapun iayel ta lawengey pikey fey ñi müley ta fij lawen ta pütokopeel fey rupan in mew ta che, femechi ñi küme naqam chi iyael, fey ta inanielu ta fey chi küme mogen pin kimün.